吳鎮宇
Francis NG

身高:180cm
籍貫:廣東番禺

語言:國語、粵語

宗教:佛教

簡介

吳鎮宇,香港著名實力派性格演員。自1985年起,他經常參演無綫劇集,以飾演反派角色最為突出。其後他亦演出過不少的處境劇集,令他逐步脫離反派角色的定型並迅速成為無綫的一線小生。其後,他只偶爾以部頭形式參與電視劇的演出,其中以97年飾演《難兄難弟》的「謝源」及03年飾演《衝上雲霄》的「Sam哥」最能令觀眾留下深刻印象。他更憑「Sam哥」一角奪得『馬來西亞星光薈萃頒獎典禮』我最喜愛電視角色獎。

96年,他在電影《古惑仔》系列內飾演反派「靚坤」,備受影評人肯定。他不但憑《爆裂刑警》獲最佳男主角,更成功揚威金馬獎。之後數年間,分別在香港電影金像獎、香港電影評論學會大獎及香港電影金紫荊獎等頒獎典禮上,先後多次奪得最佳男主角及最佳男配角殊榮。

除電視及電影外,他亦曾參與其他演出,如90年代中後期的棟篤笑《鬚根Show》系列與及和其兒子Feynman參與的真人秀節目《爸爸去哪兒》。

藝人消息

《香港華爾街》馬來西亞取景

原創迷你劇【香港華爾街】大馬吉隆坡取景拍攝,各地媒體到訪很熱鬧。

美國福斯傳媒集團(FOX)投資開拍嘅迷你劇《香港華爾街》今日喺大馬吉隆坡拍攝,一眾演員吳鎮宇、張孝全、廖啟智、余男、梁健平、陸駿光同女主角蔡潔等,喺當地一間大學內取景拍攝,現場搭建成一個立法會。

- 資料來源: 蘋果日報 -

《香港華爾街》開鏡 吳鎮宇呻劇中冇女伴

劉德華監製,吳鎮宇、張孝全主演嘅迷你劇《香港華爾街》,今日喺大潭舉行開鏡拜神儀式,《香》劇由《選戰》導演黃國強執導,其他出席嘅演員還有譚耀文、張可頤、潘燦良、陳家樂、蔡潔、崔碧珈及廖子妤等。導演指《香》劇由2014開始籌劃,監製劉德華極為緊張籌備工作,華仔受傷於醫院卧牀期間仍追收劇本。吳鎮宇曾喺華仔公司見到華仔,鎮宇話:「佢唔係病人樣,返公司都係記招樣,好整理,佢忙緊好多嘢,我冇打擾佢,佢又起唔到身,難得返一日工,好多嘢要處理。」

鎮宇喺劇中飾演金融專家,佢話:「劇情係講香港金融風暴發生過嘅事,香港本土人更有資格去講。」鎮宇苦訴自己喺劇中冇女伴,而張孝全就有余男,喺劇中飾演律師嘅張孝全話:「好期待同鎮宇合作,至於與余男有一點點親熱對手戲,未知親熱情度,都是期待。」二人完成今次合作後,會再一齊到馬來西亞為一齣電影合作。

- 資料來源: 蘋果日報 -

第三十六屆香港電影金像獎提名名單

獲提名「最佳男主角」:
余文樂《一念無明》
吳鎮宇《脫皮爸爸》
梁家輝《寒戰II》
任賢齊《樹大招風》
林家棟《樹大招風》

- 資料來源: 蘋果日報 -

鎮宇攜子撐東京電影節

為期10天的第29屆東京國際電影節昨日揭幕,今屆16部入圍主競賽單元的電影中,吳鎮宇夥拍古天樂的港片《脫皮爸爸》亦有入圍。故事改編自日本劇作家佃典彥作品,吳鎮宇帶同囝囝費曼、古天樂、春夏及導演司徒慧焯等一行七人在雨中行紅地毯,鎮宇還搣費曼耳仔,今日他繼續會參與東京電影節,並到戲院謝票見當地影迷。

- 資料來源: 蘋果日報 -

Sammi嘲鎮宇濕過條底褲

鄭秀文(Sammi)前晚繼續在紅館開騷,請來台灣歌手蕭煌奇和吳鎮宇擔任嘉賓,Sammi大爆鎮宇瘀事:「唔好睇佢𠵱家扮晒老定,其實隻手濕過條啱啱洗濕嘅底褲。」首度開金口唱歌的鎮宇獻唱《歲月如歌》,Sammi繼續玩踢爆:「佢一聽到我請佢做嘉賓,好快答應,仲馬上練歌,請老師練咗6堂。我仲要爆多個秘密,佢本來想整埋Sam哥蛋撻頭同着飛機師制服,佢真係好認真。」

- 資料來源: 蘋果日報 -

吳鎮宇唱《歲月如歌》 專登搵老師學唱歌

鄭秀文(Sammi)紅館舉行第7場《Touch Mi 2鄭秀文世界巡迴演唱會2016》,神秘嘉賓係同佢合作拍電影《衝上雲霄》嘅「Sam哥」吳鎮宇。

為咗喺紅館首次開金口唱歌,Sammi爆料指Sam哥專登搵老師學唱歌6堂,又笑佢緊張到手心出汗,Sam哥就演唱電影主題曲《歲月如歌》,估唔到又真係唱得幾下喎!

原來Sammi上次演唱會Part 1 時,已經邀請過Sam哥做嘉賓,不過嗰次佢唔閒,今次講到明嚟找數。對於Sammi演唱會失聲痛哭,Sam哥就笑笑口話:「唔緊要,今日我嚟走音比你更厲害。仲有,另一個係黃子華,佢嘅楝篤笑最好睇、最好笑就係佢自彈自唱部份。」Sammi之後仲爆鎮宇本來想整埋『Sam哥』蛋撻頭同著埋飛機師制服嚟!

- 資料來源: 蘋果日報 -

吳鎮宇孖古天樂演父子新片《脫皮爸爸》出戰東京國際電影節

今屆16部入圍主競賽單元嘅電影入面,吳鎮宇同古天樂合作嘅《脫皮爸爸》成為唯一一部入圍嘅港產片,佢哋於戲中演父子,講述人到中年嘅古仔要照顧患有腦退化症嘅80幾歲爸爸,故事改編自日本劇作家佃典彥嘅作品,在港曾經拍成同名舞台劇。吳鎮宇對於電影入圍東京國際電影節,回應話:「非常開心,大家辛苦有價值。」而由梅峰執導嘅內地片《不成問題的問題》亦入圍了主競賽部份。

- 資料來源: 蘋果日報 -

吳鎮宇銅記拍戲晒馬 驚動真警察

晚上6點左右喺銅鑼灣駱克道,見到4、50個臨時演員企喺度等拍戲,不過可能太多人嘅關係,有市民就以為真係黑社會打交,仲報埋警,嚟咗兩部警車去到現場,警方仲拎埋盾牌,不過知道係拍戲之後,就離開咗。

到咗7點左右,吳鎮宇就到咗現場,之後就由工作人員陪佢周圍行睇位,期間有市民想搵佢影相,不過因為要拍戲嘅關係,所以冇同佢一齊影。睇完位,鎮宇就同導演傾下啲機位,一陣要點做咁。

8點左右,開始拍喇,呢場戲係講吳志雄(大佬B)叫百幾個兄弟衝上前,仲填滿咗兩個街口,場面好震撼,所以都吸引咗唔少途人圍觀。當大佬拍完之後,有途人搵大佬B影相,佢都有合照。

9點鎮宇就換咗套戲服,再同導演喺機位研究走位,之後去咗同一班雜牌軍企埋一齊擺pose,十足十o靚坤再現,好似要同一兄手足去迎戰咁,鎮宇對臨時演員都好好,好用心教佢哋企位,拍咗兩個shot之後,導演就收貨,上咗一間cafe休息,途中好多市民想搵佢合照,但係天氣有啲熱,所以鎮宇只係舉高手打招呼。

- 資料來源: 蘋果日報 -

父子檔拍戲 老友達明傍實 吳鎮宇帶囝囝MK槍戰

吳鎮宇自導自演的電影一連數日在旺角銀行中心對開的行人專用區取景,不過早前就發生過有人高空擲物,又有人攔阻拍攝,最後要差人到場,總之多災多難。前日鎮宇的新戲繼續在旺角開工,今趟就順利很多,鎮宇在鬧市拍開槍戲的鏡頭,搞鬼的是槍聲是由現場工作人員即場配音,鎮宇做開槍的反應,相信在後期製作時會補上火光及真槍聲。

二百人圍觀

未正式埋位時,現場已有超過二百名圍觀者聚集。當鎮宇步出帳幕時,圍觀者都把握機會紛紛舉機拍攝。劇情先是講述持槍的鎮宇,身後有幾名同樣持槍的外籍人跟隨。鎮宇一臉殺氣步向一名打扮花俏的男子,其後他做樣連開數槍,槍聲則由現場工作人員「砰!砰!砰!」配音,花俏男就隨着「槍聲」做中槍反應,每次停機後鎮宇跟在場人群都忍不住發出笑聲。鎮宇及囝囝Feynman以父子檔上陣拍戲,Feynman打扮似足迷你版的鎮宇,全程由老竇及工作人員傍實,鎮宇不時都會教囝囝做戲。

- 資料來源: 蘋果日報 -

鎮宇讚阿佘樣靚身材正

吳鎮宇、古天樂、張家輝、佘詩曼、韓星Clara等前晚在又一城出席電影《使徒行者》首映禮,Clara以Deep V晚裝搶鏡,其間阿佘被迫到台邊變配角。吳鎮宇表示跟阿佘有少少感情戲,笑指阿佘樣靚身材正,張家輝即刻插嘴說:「我哋唔怕韓國襲擊嘅,支持本地。」提到近日大陸實施「禁韓令」,Clara指題目敏感,不知如何回應。

- 資料來源: 蘋果日報 -

千嬅笑余文樂應娶老婆 吳鎮宇會掩護小儀拍拖

楊千嬅、吳鎮宇同蘇志威噚晚去又一城出席電影《寶貝當家》嘅首映禮,鎮宇以一身o靚坤look亮相。

鎮宇話最近幫緊一套新片做預備:「套片有動作、有爆樽,有內地演員,幾個得意場面考慮畀囝囝演出,不過未必會拍。」講到好友張達明同太太何念慈分居,佢話兩個都係好有智慧嘅人,o依家潮流興冷靜,可以俾啲時間佢哋,鎮宇又讚達Ming夫婦好善良。

- 資料來源: 蘋果日報 -

千嬅請教鎮宇報學校

吳鎮宇與楊千嬅在電影《寶貝當家》飾演夫妻,童星王詩齡扮演囡囡。日前二人受訪時,千嬅大談湊小朋友樂趣:「Torres9月就升讀幼稚園K2,我有請教鎮宇,因為佢囝囝Feynman今年小學二年級,我有問佢點報學校,因為做藝人報名唔方便。」鎮宇則說:「邊間名校最憎藝人、邊間最鍾意,實際上係有啲分別,因為驚我哋惹事,引好多記者嚟追訪就唔好。」

鎮宇又稱不喜歡囝囝參加太多補習班:「變咗冇時間玩,𠵱家佢都要補英文、數學、普通話,其實只要小朋友開到竅就自然學得快。」

- 資料來源: 蘋果日報 -